Tuesday, June 28, 2011

       ಹೊತ್ತು ಮುಳುಗೋ ಹೊತ್ತು...
                                                      
           

            ಎದ್ದು, ಬಿದ್ದು,
           ಅತ್ತು, ನಲಿದು,
           ನಕ್ಕು ನಕ್ಕು ನೆಗೆದ ದಿನವ,
           ಮತ್ತೆ ಮತ್ತೆ ನೆನೆವ  ಹೊತ್ತು....
          
                      ಎಷ್ಟೋ ಕನಸು,
                      ಇಷ್ಟು ನನಸು,
                      ಭುಜದ ಶಕ್ತಿ,
                      ಮನದ ಯುಕ್ತಿ,
                      ಸೊಕ್ಕು, ಪಟ್ಟು ಮೆರೆದ ಗತ್ತು..!
                      ಮುಗಿದು ಹೋದ ಹೊತ್ತು....

          ಬೆಟ್ಟದಷ್ಟು, ಪ್ರೀತಿ ಕೊಟ್ಟು,
          ಮುಷ್ಠಿ ಪ್ರೀತಿಗಾಗಿ ಕಾದು,
          ಸೋತು ಕಣ್ಣಂಚಲಿ,
          ಬತ್ತಿದ ಕಣ್ಣೀರ ಗುರುತು..!
          ಬದುಕು ನೀರವವಾಗೋ ಹೊತ್ತು...

                       ಬೆನ್ನು ಭಾರ ಬಾಗಿ ಬಾಗಿ,
                       ಹೊರಲಾರದ ಮುದಿತನ
                       ಹೆಜ್ಜೆಗುರುತು ಕಾಣದಂತೆ,
                       ಮುಗಿದುಹೋಯ್ತು ಯವ್ವನ...
            ಹೊತ್ತೇ   ಸಾಗದು,
            ಹೊತ್ತೇ  ಹೋಗದು,
            ಮುದಿಜೀವದ,, "ಜೀವ"
           'ಅಸ್ತಂಗತಕೆ ಸಾಗೋ ಹೊತ್ತು'..
           'ಜೀವನದ',
           "ಹೊತ್ತು ಮುಳುಗೋ ಹೊತ್ತು"...!!

Saturday, March 19, 2011

             ನೆನಪಾದೆ ನೀನು...

  

         ಗರ ಗರ ತಿರುಗುತ್ತಿದ್ದ ಫ್ಯಾನು,
        ಅರಿವಿಲ್ಲದೆ ನೆನಪಾಗಿದ್ದೆ ನೀನು....

                  ಆ ಗಾಳಿಗೆ ಹಾರುತ್ತಿದ್ದ ನಿನ್ನ ಮುಂಗುರುಳು,
                  ನೆನಪಾಗಿತ್ತು ನಿನ್ನ ಕೆಂದುಟಿ,
                  ನಿನ್ನ ಕಪ್ಪು ಕಣ್ಣಿನ ನೋಟ,
                 ನಿನ್ನ ಇಂಪಾದ ಕೊರಳು....


       ನಿನ್ನ ನಗು ,
      ನಕ್ಕಾಗ ಉದುರಿದ ಮುತ್ತುಗಳು...
      ಅದ ಹೆಕ್ಕಿ ನಾ ಪೋಣಿಸಿಟ್ಟ
      ಭಾವಗಳು....

                ಪ್ರತಿ ಭಾವಗಳ ಧರಿಸಿ
               ನನ್ನೆದೆಯೊಳಗೆ ಬಚ್ಚಿಟ್ಟರೂ.,
                ಮುತ್ತುಗಳುದುರಿ ಚೆಲ್ಲಾಡಿದ್ದೇಕೆ!!?


      ಪ್ರತಿ ಬಾರಿ
     ನಾ ಬಗ್ಗಿ ಹೆಕ್ಕಿದಾಗಲೇ
     ಗಂಟು ಸಡಿಲಾಗಿತ್ತೆ??
      ಗೊತ್ತೇ ಆಗಲಿಲ್ಲ....!
             
                ಮತ್ತೆ ಗರ ಗರ ಶಬ್ದ, ಫ್ಯಾನು
                  ಜೊತೆಗಿಲ್ಲ ನೀನು...!

                            

Thursday, February 17, 2011

             ಬಂಗಾರ(ದರ!)....



ಮುಗಿಲ ಚುಕ್ಕಿಯಾಗಿದೆ
ಸಿಗದಷ್ಟು ಎತ್ತರ
 ನಿನ್ನ ದರ..........
 ಚಿನ್ನದಂಗಡಿಯ ಮುಂದೆ
 ಹೆಂಡತಿ ಹೋದರೂ,
 ಕಾಲೆಲ್ಲ ಥರ ಥರ...
                
                     ಬದಲಾಗಿದೆ ಪ್ರೀತಿಯ ರೀತಿ,,
                     ನೆನಪಾಗದಿರಲೆಂದು ಹೆಂಡತಿಗೆ
                      ಕರೆಯುವುದಿಲ್ಲ ಚಿನ್ನಾ ರನ್ನ....
                       ಅಂಗಡಿಗೆ ಹೋಗುವಾಗಲೆಲ್ಲ
                       "ನೆನಪಿಟ್ಟು" ಮರೆಯುವೆ,
                      ಡೆಬಿಟ್,  ಕ್ರೆಡಿಟ್ ಕಾರ್ಡ್ ಗಳನ್ನ....

ಮೈತುಂಬ ಬಂಗಾರ ಧರಿಸಿ,
ಮೆರೆವ ಸತಿ......
ಕಳ್ಳ ಕಾಕರಿಂದ ಅವಳ ಕಾಯುವುದು,
ಪತಿಯ ಪರಿಸ್ಥಿತಿ.......

                            ಏನೆಂದು ಹೇಳಲಿ
                           ಬಂಗಾರ ನಿನ್ನ ದರದ ಪರಿಯ...
                           ಮದುವೆಗೋ, ಮುಂಜಿಗೋ,
                           ಕರೆದೊಯ್ಯಲೂ  ಭಯ! 
                            ಹೆಂಡತಿಯ.........!!!!
                

Wednesday, January 19, 2011

ಶುಭೋದಯ..


ನಸುಕಿನ ಚಳಿಗೆ ಮುದುರಿ ಮೆತ್ತಗೆ
ಹೂ ಎಲೆಗಳ ಮೇಲೆ
ಮುತ್ತಾಗಿ ಕುಳಿತ
ಇಬ್ಬನಿ...
      ಗಿಡ ಪೊದೆಗಳ ಮದ್ಯೆ
      ಇಣುಕಿ ನುಸುಳಿ
     ಧರೆಗಿಳಿದ ಸೂರ್ಯಕಿರಣಗಳಿಗೆ
     ಕಾತರದಿ ಹೇಳಿತ್ತು
        ಶುಭೋದಯ....